مقابلة خاصة مع المرشح عصمت محمد نور صالح: “أنا ابن التبانة، وجايي كون صوتها بمجلس البلدية”
في خضم التحضيرات لانتخابات بلدية طرابلس، التقينا بالمرشح عصمت محمد نور صالح، ابن منطقة التبانة، الذي يخوض معركته الانتخابية بشغف كبير، وإيمان عميق بضرورة التغيير من قلب الناس.
س: ما الذي دفعك للترشح إلى مجلس بلدية طرابلس؟
عصمت: بكل بساطة، أنا شاب من التبانة، عشت مع الناس وشفت بأم عيني الإهمال والتهميش. حسّيت إنه صار لازم حدا من قلب المنطقة، من قلب الشارع، يرفع الصوت ويشتغل من جوّا المجلس ليخدم أهلنا مش ينساهن بعد الانتخابات.
س: ما أبرز أولوياتك إذا وصلت إلى المجلس البلدي؟
عصمت: عندي أولويتين أساسيات، برأيي بيرجعوا هيبة للبلدية وثقة الناس فيها:
أولاً، إعادة تفعيل دور شرطة البلدية، ، وتحس الناس إنه في سلطة تحميهم وتحافظ على النظام.
ثانياً، إحياء اللجان الشعبية والتنسيق بينها وبين المجلس البلدي، ليرجع القرار البلدي نابع من الحي، من الناس نفسهم. بدون لجان شعبية ما في تواصل حقيقي، وبيصير المواطن مغيّب.
س: ما الرسالة التي تحب أن توصلها لأهالي طرابلس، والتبانة تحديداً؟
عصمت: بقول لأهلي بكل وضوح: ما عاد فينا ننطر وعود، بدنا نكون نحنا التغيير. أنا ما جايي بوعد بشي مش بإيدي، جايي أكون صوتكن جوّا البلدية، أقاتل كرمال حقوقكن، الخدمات، البنى التحتية، الصحة، التعليم، والكرامة قبل كل شي.
س: ماذا يميزك عن باقي المرشحين؟
عصمت: مش عم نافس حدا بشخصه، بس اللي بيميزني إني ما فصلت حالي عن الناس بيوم من الأيام. ما بشتغل سياسة موسمية، أنا كل يوم بالشارع، وبعرف الوجع، وبعرف شو ناقص كل حي وكل زاروب من التبانة.
س: كلمة أخيرة؟
عصمت: بعرف طريق الإصلاح صعب، بس إذا وقفنا سوا، فينا نغيّر. صوتكن أمانة، وإذا عطيتوني ثقتكن، بوعدكن ما أخونها.
